Dünən, 20:03
Azərbaycan qadını cəmiyyətin
inkişafının aparıcı qüvvəsidir
Tarixin bütün dövrlərində Azərbaycan qadını cəmiyyətimizin inkişafında, milli dəyərlərimizin qorunmasında və dövlətçiliyimizin möhkəmlənməsində mühüm rol oynamışdır. Qədim dövrlərdən bu günə qədər qadınlarımız yalnız ailənin deyil, bütövlükdə cəmiyyətin mənəvi dayağı olmuş, öz müdrikliyi, fədakarlığı və iradəsi ilə tariximizin şərəfli səhifələrini yazmışlar. Azərbaycan xalqının ən qədim yazılı abidələrindən biri olan “Kitabi-Dədə Qorqud” dastanında qadınların göstərdiyi şücaət, eləcə də Tomris, Sara Xatun, Möminə Xatun kimi tarixi şəxsiyyətlərin fəaliyyəti Azərbaycan qadınının gücünün, iradəsinin və liderlik keyfiyyətlərinin parlaq nümunəsidir. Bu nümunələr sübut edir ki, Azərbaycan qadını tarix boyu həm ailənin dayağı, həm də cəmiyyətin inkişafına yön verən mühüm bir qüvvə olmuşdur.
Azərbaycan qadınları yalnız mənəvi dəyərlərin qorunmasında deyil, həm də dövlət quruculuğu və ictimai-siyasi proseslərdə fəal iştirak etmişlər. Şərqdə ilk dəfə olaraq qadınlara seçib-seçilmək hüququnun məhz Azərbaycanda – Azərbaycan Xalq Cümhuriyyəti dövründə verilməsi xalqımızın qadına verdiyi yüksək dəyərin bariz göstəricisidir. Bu mühüm addım Azərbaycan qadınının ictimai həyatda rolunun genişlənməsinə, onların elm, təhsil, mədəniyyət, səhiyyə və digər sahələrdə fəal iştirakına geniş imkanlar yaratmışdır. Qadınlarımız yüzillər boyu milli dəyərlərə sadiq qalaraq ana dilimizin, mədəniyyətimizin və mənəviyyatımızın qorunub saxlanılmasında da mühüm rol oynamışlar.
Müstəqil Azərbaycan dövlətində qadın siyasətinin formalaşması və inkişafı Ümummilli Lider Heydər Əliyevin adı ilə bağlıdır. Ulu Öndər ölkə həyatının bütün sahələrində qadınlara xüsusi diqqət yetirmiş, onların potensialından səmərəli istifadə olunması üçün geniş imkanlar yaratmışdır. Onun təşəbbüsü ilə qəbul edilən qərarlar və həyata keçirilən tədbirlər qadınların dövlət idarəçiliyində, ictimai-siyasi proseslərdə və müxtəlif sahələrdə fəal iştirakına yol açmışdır. Bu siyasət bu gün də Prezident İlham Əliyev tərəfindən uğurla davam etdirilir. Dövlət başçısının rəhbərliyi ilə qadın hüquqlarının qorunması, gender bərabərliyinin təmin olunması və qadınların sosial-iqtisadi imkanlarının genişləndirilməsi istiqamətində ardıcıl addımlar atılır.
Son illərdə qəbul olunan qanunlar, dövlət proqramları və milli fəaliyyət planları qadınların hüquqlarının müdafiəsi və onların ictimai fəallığının artırılması istiqamətində mühüm nəticələrə səbəb olmuşdur. Bu gün Azərbaycan qadınları dövlət idarəçiliyində, parlamentdə, elmdə, təhsildə, səhiyyədə, mədəniyyətdə, sahibkarlıq sahəsində və digər istiqamətlərdə uğurla fəaliyyət göstərir, ölkəmizin inkişafına öz dəyərli töhfələrini verirlər. Statistik göstəricilər də qadınların cəmiyyət həyatındakı fəallığının artdığını göstərir. Qadınların məşğulluq səviyyəsinin yüksəlməsi, sahibkarlıq fəaliyyətində iştirakının genişlənməsi və müxtəlif sahələrdə təmsilçiliyinin artması ölkədə həyata keçirilən gender siyasətinin müsbət nəticələrindən biridir.
Azərbaycan Respublikasının Birinci vitse-prezidenti Mehriban xanım Əliyevanın çoxşaxəli fəaliyyəti də Azərbaycan qadınının nüfuzunun həm ölkə daxilində, həm də beynəlxalq aləmdə daha da yüksəlməsinə mühüm töhfə verir. Onun rəhbərlik etdiyi humanitar və sosial layihələr, xeyriyyəçilik təşəbbüsləri, mədəniyyətimizin və milli dəyərlərimizin dünyada tanıdılması istiqamətində görülən işlər Azərbaycan qadınının mərhəmətini, humanizmini və yüksək mənəvi keyfiyyətlərini bütün dünyaya nümayiş etdirir.
Bu gün Azərbaycan qadını ölkənin ictimai-siyasi həyatında fəal iştirak edir, dövlət idarəçiliyində, elmi və mədəni mühitdə, həmçinin səhiyyə və sosial sahələrdə mühüm uğurlar qazanır. Xüsusilə səhiyyə sistemində çalışan qadınların əməyi cəmiyyət üçün böyük əhəmiyyət daşıyır. İnsanların sağlamlığının qorunması və həyat keyfiyyətinin yaxşılaşdırılması naminə çalışan qadın tibb işçiləri yüksək peşəkarlıq, məsuliyyət və fədakarlıq nümayiş etdirərək cəmiyyətə dəyərli xidmət göstərirlər.
8 Mart – Beynəlxalq Qadınlar Günü münasibətilə bütün xanımları səmimi-qəlbdən təbrik edir, onlara möhkəm can sağlığı, ailə səadəti və həyatlarının bütün sahələrində yeni uğurlar arzulayıram. Əminəm ki, Azərbaycan qadını bundan sonra da öz zəhməti, müdrikliyi və fədakarlığı ilə ölkəmizin inkişafına töhfə verməyə davam edəcək, cəmiyyətimizin tərəqqisində mühüm rol oynayacaqdır.
Səkinə Sadıxova
Abşeron Rayon Mərkəzi Xəstəxanasının direktoru
6-03-2026, 19:19
Vaqif Rüstəmov –75
Sadə və mənalı
ziyalı ömrü...
1980-cı illərin ortaları idi, “Bakinskiy raboçiy” qəzetinin Mil-Muğan zonası üzrə xüsusi müxbiri vəzifəsinə təyin edilmişdim. Hardasa 27-28 yaşım vardı. Yadımdadır, güllü-çiçəkli bir bahar günü İmişliyə gəlmişdim. Birinci katib paytaxtdan gələn qonaqlarla harasa tədbirə getmişdi. Dedilər ki, ən tezi 1 saata qayıdar. Yəni boş, asudə vaxtım yaranmışdı. Hörmətli İmişli camaatının dili ilə desək, “eycahanllıq” idi.
İmişli Rayon Tarix Diyarşünaslıq muzeyinə baş çəkməyi qərara aldım. Muzey raykomdan cəmi 70-80 metr aralıda, milli memarlıq üslubunda yeni inşa edilmiş binada yerləşirdi. Qarşısında səliqə ilə rəngarəng güllər əkilmişdi. Xüsusilə təzə açmış ağ, qırmızı, çəhrayı qızılgüllərə baxanda ürəyim açıldı. İçəri daxil oldum. Düşündüm ki, nə yaxşı ki, muzeylərdə bəzi idarələrdə olduğu kimi, “Bura niyə gəlmisiniz, sizə kim lazımdır?” - deyə soruşmurlar.
O vaxtlar zona müxbirləri bölgələrdə fəaliyyət göstərən muzeylərdən az-az hallarda yazılar hazırlayırdılar. Bəlkə də elə buna görə muzeyin gənc, mehriban, gülərüz direktoru mənim qəfil gəlişimə həm təəccüb etdi, həm də çox sevindi. “Xoş gəlibsiniz. Mən özüm də ara-sıra respublikanın aparıcı qəzetləri ilə əməkdaşlıq edirəm” -dedi.
“Bilirəm, imzanızı tanıyıram. Vaqif Rüstəmovsunuz!” Mənim bu sözlərimə cavab olaraq onun mənalı gözlərində dərin minnətdarlıq ifadəsi oxudum. Əllərini qızılı qıvrım saçlarına çəkdi. Simasında xoş ovqat yaranmışdı. Böyük həvəslə muzeyin fəaliyyəti, buradakı eksponatlar barədə xeyli söz açdı. Dedi ki, rayon ziyalıları, məktəblərin yuxarı sinif şagirdləri bura tez-tez gəlirlər. Hətta muzeyə nadir məişət əşyaları hədiyyə edənlər də olur.
Vaqif müəllimlə sonra xalqımızın tarixii, mədəniyyəti, ayrı-ayrı görkəmli şəxsiyyətləri barədə xeyli söhbət etdik. Səlis və məntiqli danışığı, hərtərəfli biliyi, geniş erudisiyası, xüsusilə pozitiv aurası məndə ona qarşı dərin rəğbət hissi yaratdı. O gündən başlanan dostluq əlaqələrimiz bu gün də davam edir. Heç vaxt bir-birimizdən zərrə qədər inciməmişik. Əksinə, hər dəfə görüşəndə şad olmuşuq, hal-əhval tutmuşuq, uğurlarımıza sevinmişik.
Vaqif Rüstəmov Allahın lütfü ilə ömrünün 75 illik zirvəsinə çatır. Onun həyatını, demək olar ki, əzbər bildiyim üçün, bəzi avtobioqrafik məlumatları oxucuların nəzərinə çatdırmağı özümə borc bilirəm. Vaqif 1951-ci il martın 14-də İmişli şəhərində doğulub, burada da boya-başa çatıb. Atası Misir kişi İmişliyə ailəsi ilə birlikdə 1939-cu ildə Cəbrayıl rayonunun Daşkəsən kəndindən köçüb.
Rüstəmovlar ailəsi tez-tez Daşkəsən kəndinə gedərək oradakı doğmalarına baş çəkiblər. Xüsusilə yay aylarında Mildən Muğana getməyin bir ayrı səfası var. Axar-baxarlı bu kənd öz gözəl təbiəti, saf suyu, sərin bulaqları ilə Vaqifi hələ uşaq yaşlarından özünə cəlb edib. Sonradan ali təhsilli tarixçi kimi Qarabağla, eləcə də Daşkəsənlə bağlı xeyli araşdırmalar aparıb, bu barədə məqalələr yazaraq dərc etdirib.
Xatırladaq ki, Daşkəsən kəndinin akademik Mehdi Mehdizadə kimi görkəmli yetirməsi olub. Bu böyük pedaqoq 30 ilə yaxın Azərbaycanın maarif naziri vəzifəsində çalışıb, respublikamızda təhsilin inkişafı üçün danılmaz xidmətlər göstərib. Vaqif Rüstəmov ömrü boyu akademikin uzaq qohumu olması ilə fəxr edib, amma heç vaxt bu böyük alimin mənzilinin qapısını döyməyib. Ümumiyyətlə, o, nə özü, nə də övladları üçün heç bir xahiş və təmənnada bulunmağı sevmir.
Vaqif Rüstəmov orta məktəbdə əla qiymətlərlə oxuyub. 1978-ci ildə Azərbaycan Dövlət Pedaqoji Universitetinin tarix fakültəsini bitirib və təyinatla İmişli rayonundakı Xubyarlı kənd orta məktəbində işləməyə başlayıb. Enerjili, təşəbbüskar pedaqoq ilk gündən şagirdlərin qəlbində tarix fənninə dərin maraq oyatmağa çalışıb və buna nail olduqca çox sevinib.
Xubyarlıda çox savadlı və bacarıqlı bir tarix müəlliminin çalışdığı, həm həmkarları, həm də kənd əhalisi arasında dərin hörmət qazandığı barədə müsbət xəbərlər tezliklə hər yerə yayılıb. Bu, İmişli rayon partiya komitəsinin birinci katibi Qadir İsmayılzadənin diqqətindən yayınmayıb. Qeyd etmək lazımdır ki, Qadir müəllim partiya işinə məhz təhsil sahəsindən gəlmişdi və öz peşəsinə dərin sevgi və məsuliyyətlə yanaşan gənc pedaqoqlara böyük qayğı ilə yanaşırdı. Qadir İsmayılzadə hər dəfə Xubyarlıya yolu düşəndə kənd orta məktəbinə də baş çəkib və “qızılı saçlı” gənc tarix müəllimi ilə ayrıca söhbət edərək onun qayğı və problemləri ilə maraqlanıb. Vaqif müəllimin savadı, etikası, davranışı birinci katibin xoşuna gəlib. Məhz Qadir İsmayılzadənən təşəbbüsü ilə Vaqif Rüstəmov 1983-cü ildə rayon mərkəzində yeni açılan İmişli Rayon Tarix Diyarşünaslıq Muzeyinin direktoru vəzifəsinə təyin edilib.
Ədalət naminə demək lazımdır ki, Vaqif Rüstəmovun rəhbərliyi ilə İmişli Rayon Tarix Diyarşünaslıq Muzeyi qısa müddət ərzində nəinki bu rayonun, eyni zamanda respublikanın ən qabaqcıl mədəniyyət müəssisələrindən birinə çevrilib. O illərdə respublikanın bir çox tanınmış simaları, eləcə də böyük alim, vətənpərvər ziyalı Xudu Məmmədov bu muzeyin qonağı olub, Vaqif müəllimi dinləyəndən sonra deyib ki, “sizin tarixmizə ekskursiyanızdan çox razı qaldım. Bundan sonra da çalışın ki, gələcək nəsillərimiz tariximizi sizin kimi dərindən öyrənsinlər. Axı Vətəni sevmək onu tanımaqdan başlayır!”
Bir müddətdən sonra Vaqif Rüstəmovu Mədəniyyət Nazirliyinin Tarixi Abidələrin Mühafizəsi və Bərpası İdarəsində işləmək üçün paytaxta dəvət ediblər. O, burada da öz işini sevən, məsuliyyətli kadr kimi fərqlənib, respublikanın əksər bölgələrindəki muzeylərdə olub, yerlərdə muzey işinin səmərəli təşkili üçün əməli tapşırıqlar verib. Sonra qısa müddət Nərimanov rayon icra hakimiyyətində müvəkkil vəzifəsində çalışıb.
Vaqif Rüstəmov muzey işini əla bilsə də, ruhən pedaqoq idi. Hiss edirdi ki, təhsil sahəsində çalışsa, millətinə, onun övladlarına daha çox fayda verə bilər. 2001-ci ildən Bakının Yeni Günəşli qəsəbəsindəki “V” massivində yerləşən 278 nömrəli orta məktəbdə tarix fənnindən dərs deməyə başlayıb. 16 il bu qabaqcıl təhsil müəssisəsində şagirdlərə tariximizi sonsuz sevgi ilə tədris edib. Onun dərs dediyi məzunların çoxu hər il qəbul imtahanlarında yüksək bal toplayıblar. Vaqif müəllim artıq 7-8 ildir ki, təqaüddədir. Təqaüdə çıxandan sonra o, çoxları kimi, elə mənim üçün də gözlənilməz olaraq, bədii və publisistik yaradıcılıqla intensiv surətdə məşğul olmağa başladı. Əvvəlcə bir xeyli şeir və hekayələr yazdı, sonra nəsrə keçdi. Əvvəlcə Qaçaq Süleymandan bəhs edən eyniadlı romanı geniş oxucu kütləsi tərəfindən maraqla qarşılandı. İkinci romanını isə “Səsverən qaya” adlandırdı.
Vaqif Rüstəmov 3-4 il əvvl muğamsevərlər arasında “Dədə Süleyman” kimi tanınan mərhum xanəndə Süleyman Abdullayev haqqında “Səsin sorağında...” adlı elə bir dəyərli sənədli-publisistik əsər qələmə aldı ki, bu əsər bir çox məziyyətləri ilə çoxlarını yaxşı mənada təəccübləndirib. Mən şəxsən bu qiymətli əsəri oxuduqca ürəyimdə müəllifə dəfələrlə “əhsən!” demişəm. Bu yaxınlarda isə onun Cəbrayıl rayonunun Daşkəsən kəndindən olan Səxavət Alı oğlu İsmayılov adlı bir nəfərin İkinci Dünya müharibəsindən sonra qürbətdə keçən keşməkeşli taleyindən bəhs edən “Yurd həsrəti” adlı yeni kitabı nəşr olunub. Qürbətin möhnəti, əlbəttə, çox ağır, dözülməz olur. Vaqif Rüstəmov təcrübəli qələm sahibi kimi qəhrəmanının narahat psixoloji durumunu ustalıqla aça bilib.
...Vaqif Rüstəmov hazırda Yeni Günəşlidə 9 mərtəbəli evin sonuncu mərtəbəsində yaşayır və onun mənzilinin eyvanından bir vaxtlar dərs dediyi məktəbin həyəti ovuc içi kimi aydın görünür. O, bəzən səhərlər dərsə tələsən şagird və müəllimləri uzaqdan müşayiət edərək kövrək xatirələrə dalır.
O, xoşbəxtlikdən, nikbin və müdrik insandır. Düşünərm ki, sadə, mənalı, maraqlı bir ömür yaşadığı üçün Vaqif Rüstəmovun geriyə boylanıb sevinməyə, yaşanan mənalı günlər, aylar, illər üçün qürur duymağa tam mənəvi haqqı var!
Məsaim ABDULLAYEV,
Əməkdar mədəniyyət işçisi.
6-03-2026, 18:24
“Avroviziya 2026”da Azərbaycan təmsilçisi məlum oldu
Azərbaycanı “Avroviziya 2026” mahnı müsabiqəsində JIVA təmsil edəcək. JIVA (Cəmilə Həşimova) azərbaycanlı müğənnidir.
Bu barədə müsabiqənin rəsmi səhifəsində məlumat verilib.
Onun yaradıcılıq yolu 2003-cü ildə keçirilən “Bakı Payızı” müsabiqəsində 2-ci yer qazanması ilə başlayıb. O, 2007-ci ildə “Show Time” layihəsində iştirak edib, 2011-ci ildə isə “Avroviziya” milli seçim həftəsində ilk üçlüyə daxil olmağı bacarıb.
Müğənni müxtəlif musiqi layihələrində iştirak edib. O, Xalq artisti Rəşad Haşımovun rəhbərlik etdiyi məşhur RAST ansamblı ilə çıxış edib və “Montreux Jazz” festivalında səhnəyə çıxıb. Daha sonra Hazz Band qrupunun solisti kimi fəaliyyət göstərərək caz elementlərini müasir estrada ilə birləşdirib.
2017-ci ildən etibarən JIVA karyerasını solo olaraq davam etdirir. O, pop, dance və R&B janrlarında azərbaycan, rus və ingilis dillərində mahnılar ifa edir.
Xatırladaq ki, Azərbaycanın “Avroviziya 2026” beynəlxalq mahnı müsabiqəsində təmsil olunması üçün keçirilən seçim mərhələsinə ümumilikdə 100 müraciət daxil olub və bu çərçivədə 186 mahnı təqdim edilib. Təqdim olunan mahnılardan 107-si yerli müəllif və ifaçılar, 79-u isə xarici müəlliflər tərəfindən göndərilib.
İlkin qiymətləndirmə mərhələsində müraciətlər peşəkar heyət tərəfindən nəzərdən keçirilib və növbəti mərhələyə 18 namizəd dəvət olunub. Onlar üçün canlı dinləmələr və fərdi müsahibələr təşkil edilib. Bu mərhələdə namizədlərin vokal imkanları, səhnə təqdimatı və beynəlxalq auditoriya üçün potensialı qiymətləndirilib.
Qiymətləndirmələrin nəticəsində üç namizəddən ibarət qısa siyahı (shortlist) formalaşdırılıb. Yekun qərar xüsusi formalaşdırılmış fokus qrupunun qiymətləndirməsi əsasında qəbul olunub və Azərbaycanın builki təmsilçisi kimi JIVA seçilib.
Qeyd edək ki, “Avroviziya 2026” beynəlxalq mahnı müsabiqəsi Avstriyanın paytaxtı Vyana şəhərində keçiriləcək. Yarışmanın birinci yarımfinalı 12 may, ikinci yarımfinalı 14 may, böyük final isə 16 may 2026-cı il tarixində baş tutacaq.
24-02-2026, 16:47
Nəriman Həsənzadə Prezidentə təşəkkür etdi - bu təltif ruhumla yaşayacaq
Azərbaycan Prezidenti Administrasiyasının rəhbəri Samir Nuriyev dövlət başçısının tapşırığına uyğun olaraq, mədəniyyətimizin inkişafında müstəsna xidmətlərinə görə “Heydər Əliyev” ordeni ilə təltif edilmiş Xalq şairi Nəriman Həsənzadəni evində ziyarət edib və ali mükafatı ona təqdim edib.
Xalq şairi Nəriman Həsənzadə mükafatla bağlı təəssüratını bölüşüb.
O, Prezident İlham Əliyevə dərin minnətdarlığını bildirib:
"Mən bu yüksək ordeni, ali mükafatı çox ləyaqətlə daşımalıyam və daşıyacam da. Buna görə cənab Prezidentə məni yada salıb təltif etdiyinə görə minnətdaram.
Prezidentin nəzərində olduğumu, məni yada salmağını ömrümün sonunadək unutmayacam. Cənab Prezident çox sağ olsun ki, məni belə yüksək mükafata layiq görüb. Hörmətli İlham Əliyev mənəviyyatca yüksək səviyyəli alqışalayiq dövlət başçısıdır. Mən onun bu adımına qarışıqlıq bunu deyə bilərəm. Bu təltif daimi olaraq mənim ruhumla yaşayacaq və heç vaxt unudulmayacaq".
Nəriman Həsənzadə səhhəti ilə bağlı ciddi narahatlığının olmadığını da bildirib.
Qeyd edək ki, 95 yaşlı Xalq şairi hazırda müalicə alır. Köməkçisinin yardımı ilə gəzə bilir.
21-02-2026, 16:19
İran sənətçilərinin Bakı səfəri: Onları kimlər qarşılamışdı?
1960-cı illərdə İran mədəniyyət xadimlərinin Azərbaycana səfərləri rəsmi protokoldan çox, ədəbi və musiqi mühitin qarşılıqlı marağı üzərində qurulurdu.
Həmin illərdə İrandan gələn sənət adamları arasında farsdilli rəsmilərlə yanaşı, Güney azərbaycanlıları da var idi. Onların Bakıya, Gəncəyə və digər mədəni mərkəzlərə səfəri eyni mədəni arealın parçalanmış hissələrinin görüşü kimi qəbul olunurdu. Sənət adamlarının görüşündə dil baryeri demək olar ki, yox idi, səhnədə, poeziyada və musiqidə tərcüməyə ehtiyac duyulmurdu. Eyni zamanda, bu səfərlər tamamilə apolitik də deyildi.
İl 1964-cü ilin payızı... İranın tanınmış musiqiçiləri Bakıya qastrol səfərinə gəliblər.
Şəkildə həmin dövrdə Azərbaycan mədəni mühitində mühüm yer tutan mədəniyyət xadimləri İran sənətçilərilə bir arada əks olunub.
Kadra düşənlər arasında sağdan sola Xan Şuşinski, iranlı müğənni İlahə xanım, Məsudi, skripkaçı Həbibullah Bədir, tarzən Fərhəng Şərif, Ramiz Zöhrabov, Mərziyə xanım, Sara Qədimova, Emin Sabitoğlu, Hacı Xanməmmədov, Əbülfət Əliyev, Cahangir Aslanoğlu və digər sənətçilər yer alıb.
14-02-2026, 17:10
Əməkdar artistlərin oğlu teatra rəhbər gətirildi
Azərbaycan Dövlət Akademik Rus Dram Teatrına yeni direktor təyin olunub.
Bu barədə Mədəniyyət Nazirliyi məlumat yayıb.
Qeyd edilib ki, mədəniyyət naziri Adil Kərimlinin müvafiq əmri ilə Oleq Əmirbəyov bu vəzifəyə təyin olunub.
Əməkdar artist Oleq Əmirbəyov bu təyinatadək mədəniyyət nazirinin müşaviri vəzifəsində çalışıb.
Xatırladaq ki, Oleq Arnoldoviç Əmirbəyov 16 dekabr 1986-cı ildə Bakıda Azərbaycanın əməkdar artistləri Arnold Xarçenko və Rita Əmirbəyovanın ailəsində anadan olmuşdur.
14-02-2026, 17:06
Brilliyant Dadaşovanın yoldaşına yüksək vəzifə verildi
Gəncə Dövlət Milli Dram Teatrının direktoru vəzifəsinə təyinat olub.
Bu barədə Mədəniyyət Nazirliyi məlumat yayıb.
Mədəniyyət naziri Adil Kərimlinin müvafiq əmrinə əsasən, Ədalət Qasım oğlu Hacıyev Gəncə teatrının direktoru təyin olunub.
Ədalət Hacıyev son təyinatadək Azərbaycan Dövlət Akademik Rus Dram Teatrına rəhbərlik edib. O, Xalq artisti Brilliant Dadaşovanın həyat yoldaşıdır və onların bir oğulları var.
13-02-2026, 16:11
Dövlət idarəçiliyində süni intellektin tətbiqi və xidmətlərin vahid mərkəzdən göstərilməsi strateji zərurətdir
Süni intellekt, “mygov” və kibertəhlükəsizlik Azərbaycan üçün strateji prioritetdir.
Prezident İlham Əliyev dövlət idarəçiliyində süni intellektin tətbiqinin genişləndirilməsinin vacibliyini vurğulayaraq bildirib ki, aparıcı ölkələrdə bu sahədə mühüm nailiyyətlər əldə olunub. Dövlət başçısı qeyd edib ki, inkişaf etmiş ölkələrdə dövlət məmurlarının gündəlik fəaliyyətində “süni intellekt agentləri” tətbiq edilir və bu sistemlər qərarların düzgünlüyünün qiymətləndirilməsində yardımçı rol oynayır. Onun sözlərinə görə, rəhbər vəzifələrdə təmsil olunan şəxslər süni intellektdən geniş istifadə etməlidirlər.
Analitik baxımdan bu yanaşma dövlət idarəçiliyində məlumat əsaslı qərarvermə modelinə keçidin göstəricisi kimi qiymətləndirilir. Süni intellekt böyük həcmli məlumatların operativ təhlilinə, risklərin əvvəlcədən müəyyənləşdirilməsinə və alternativ ssenarilərin hazırlanmasına imkan yaradır. Bu isə idarəetmədə çevikliyi və səmərəliliyi artırır, insan faktorundan qaynaqlanan subyektiv riskləri azaldır.
Dövlət başçısı eyni zamanda dövlət xidmətlərinin “mygov” platforması üzərindən – vahid mərkəzdən həyata keçirilməsinin vacibliyini də diqqətə çatdırıb. Prezident bildirib ki, son illər müxtəlif dövlət qurumları tərəfindən ayrı-ayrı platforma və tətbiqlər hazırlanıb. Lakin artıq bu proses koordinasiyalı şəkildə aparılmalı, mövcud platformalar tədricən vahid sistemdə birləşdirilməlidir. Dövlət xidmətləri “mygov” üzərindən təqdim olunmalı və həm dövlət qurumları, həm də vətəndaşlar üçün bu, əsas ünvan olmalıdır.
Analitik qiymətləndirməyə görə, vahid rəqəmsal platformanın yaradılması idarəetmədə mərkəzləşmiş informasiya sisteminin formalaşmasına, resursların optimallaşdırılmasına və təkrarlanan funksiyaların aradan qaldırılmasına xidmət edir. Bu yanaşma vətəndaş məmnunluğunu artırmaqla yanaşı, dövlət xidmətlərinin əlçatanlığını və şəffaflığını gücləndirir. “Bir pəncərə” prinsipinin rəqəmsal müstəvidə tətbiqi vətəndaş üçün vaxt itkisini minimuma endirir və xidmətləri daha rahat edir.
Prezident İlham Əliyev əldə edilmiş nəticələri yüksək qiymətləndirdiyini bildirməklə yanaşı, mövcud platformaların üstünlüklərinin, toplanmış təcrübənin və bu sahədə çalışmış kadr potensialının ümumi sistemə inteqrasiya olunmasının vacibliyini qeyd edib. Bu yanaşma institusional davamlılığın və insan kapitalının qorunmasını təmin edir.
Ölkəmizdə süni intellektin tətbiqi ilə “mygov” kimi vahid platformanın inteqrasiyası dövlət idarəçiliyində yeni mərhələnin başlanğıcı ola bilər. Mərkəzləşdirilmiş məlumat bazası süni intellekt alqoritmlərinin daha dəqiq və effektiv işləməsinə şərait yaradacaq. Bu isə strateji planlaşdırma, sosial siyasət, iqtisadi proqnozlaşdırma və dövlət xidmətlərinin idarə olunmasında keyfiyyətcə yeni model formalaşdıracaq.
Beləliklə, Prezident İlham Əliyevin səsləndirdiyi fikirlər rəqəmsal transformasiyanın dərinləşdirilməsi, idarəetmənin modernləşdirilməsi və vətəndaş yönümlü dövlət modelinin möhkəmləndirilməsi istiqamətində kompleks və strateji yanaşma kimi dəyərləndirilir.
Eyni zamanda dövlət başçısı rəqəmsal transformasiyanın yalnız dövlət sektoru ilə məhdudlaşmaması, özəl sektorda da dəstək mexanizmlərinin tətbiqinin vacibliyini vurğulayıb. Bununla innovasiya mühitinin inkişafı, startapların və texnologiya şirkətlərinin təşviqi, həmçinin yerli texnoloji məhsulların ixrac potensialının artırılması təmin ediləcək.
Prezident İlham Əliyev kibertəhlükəsizliyin strateji önəmini də diqqətə çatdırıb. Ötən il Azərbaycan mütəşəkkil və aqressiv kiberhücuma məruz qalıb, lakin lazımi tədbirlər görülərək təhlükələrin qarşısı alınıb. Kibertəhlükəsizlik Mərkəzinin fəaliyyəti davamlı diqqət mərkəzində olmalı, beynəlxalq təcrübə öyrənilməli və kritik informasiya infrastrukturu qorunmalıdır.
Zamin Zeynal,
Abşeron Rayon İcra Hakimiyyəti yanında İctimai Şuranın sədr müavini, Müasir İnternet Resurslarının İnkişafı İctimai Birliyinin sədri
10-02-2026, 20:17
“ANİMASİYAYA
QISA SƏYAHƏT”
Bəzən insanı illər əvvələ aparmaq üçün uzun yol getməyə ehtiyac olmur. Bir səs, bir rəng, bir cizgi kifayət edir. Bu gün sizi xatirələrin danışdığı, xəyal gücünün hərəkətə gəldiyi animasiyanın sehrli dünyasına aparırıq. İlk cizgidən bu günün rəqəmsal ekranına qədər- animasiyaya qısa, amma duyğulu bir səyahətə çıxırıq.
Animasiyanın tarixi, əslində, xəyal gücünün tarixidir.
XIX əsrin sonu, XX əsrin əvvəlləri… İnsan ilk dəfə rəsmlərə həyat verməyə çalışır.
1898-ci ildə kukla animasiyasının ilk cəhdlərindən sayılan “Liliput sirki” ekranlara çıxır. 1906-cı ildə isə amerikalı rejissor Ceyms Stüart Blektonun “Gülməli sifətlərin yumoristik mərhələləri” adlı işi, rəsmlə canlı təsvirin birləşdiyi önəmli nümunələrdən biri olur. Amma animasiya tarixində əsas dönüş nöqtəsi 1908-ci ilə təsadüf edir.
Fransalı Emil Kolun “Fantasmaqoriya” filmi dünyada ilk tam əl ilə çəkilmiş, kadr-kadr animasiya kimi tarixə düşür.
Sadə ağ xətlər, qara fon…
Amma böyük bir inqilab. Cizgilər danışmağa, xəyallar hərəkət etməyə məhz o zaman başladı. İllər keçir. Bu sehr dünyanın sərhədlərini aşır və bir gün Azərbaycan ekranına da gəlib çatır.
1969-cu il. Azərbaycanda ilk animasiya filmi - “Cırtdan”.
“Azərbaycanfilm” studiyasında Elçin Əfəndiyevin rəhbərliyi ilə çəkilən bu film, milli üslubun animasiyaya çevrilmiş forması idi.
Əslində, animasiyanın təməli 1968-ci ildə təşkil olunan kurslarla qoyulmuşdu. Amma “Cırtdan” yerli animasiya üçün yeni bir mərhələnin başlanğıcı oldu.
Zaman dəyişir. Texnologiya sürətlənir. Qrafika sərhədsizləşir.
Amma animasiyanın missiyası dəyişmir - insanı öz kökünə qaytarmaq, saf duyğularla üz-üzə qoymaq. Bəlkə də animasiyanın ən gözəl tərəfi elə budur, orada böyüklər də uşaq ola bilir.
Bahar TELMANQIZI
7-02-2026, 13:58
Gələcəyə Daşınan
Keçmiş:
“Avey” Qoruğunun
37 İllik Salnaməsi
Qazax rayonunda fəaliyyət göstərən “Avey” Dövlət Tarix-Mədəniyyət qoruğu 1989-cu il 22 fevral tarixində Azərbaycan Nazirlər Sovetinin 99 № li qərarı ilə yaradılıb. Azərbaycan Elmlər Akademiyası, Respublika Mədəniyyət Nazirliyi və Qazax XDS İcraiyyə Komitəsinin 14 saylı iclas protokolu əsasında “Avey” Dövlət qoruğunun əraziləri rəsmiləşdirilmişdir. Qoruğun Nizamnaməsi yazılmış, əsas fəaliyyət növü müəyyən edilmiş, möhürü, ştampı hazırlanmış və qoruğa təqdim edilmişdir.
“Avey” Dövlət Tarix-Mədəniyyət qoruğu zəngin tarixi memarlıq və arxeoloji abidələr diyarı kimi ən qədim daş dövrünün yadigarı olan “Avey” məbədinin adı ilə adlandırılıb. Qoruğun iş prinsipi abidələr haqqında məlumat toplamaq, abidələrin qorunması, toxunulmazlığı və bərpasını təmin etməkdir. Qoruq əsasən tarix, mədəniyyət, memarlıq, bədii və etnoqrafiya və digər folklorşünaslıqla məşğuldur. Qoruğun ərazisində olan: arxeoloji və memarlıq abidələri, daşınan və daşınmaz tarixi və mədəniyyət abidələri qoruğun əsas mülkiyyəti hesab olunur. Bu ərazilərdə yüzlərlə qədim paleolt, mezeolit, eneolit, orta əsr, tunc, mis dövrlərinin və sonrakı tarixi əsrlərin mədəniyyət abidələri mövcuddur.
Qoruq bir müddət Nazirlər Komitəsinin nəzdində “Tarix və Mədəniyyət Abidələrinin Mühafizəsi və Bərpası” adı altında fəaliyyət göstərmiş, hazırda Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti tabeçiliyində fəaliyyətini davam etdirir.
“Avey” Dövlət Tarix-Mədəniyyət Qoruğunun ərazisində 56 abidə qeydiyyata alınmışdır. Bu abidələrdən 1-i dünya, 33-ü ölkə, 22-si isə yerli əhəmiyyətlidir. Onların 15-i memarlıq, 36-sı arxeoloji, 5-i dekorativ tətbiqi-sənət nümunəsidir. Abidələrdən 13-ü sərhəd zolağında, 14-ü isə işğal altındadır.
“Avey” Dövlət Tarix-Mədəniyyət Qoruğunun sahəsi 3613 hektardır. Qoruğun 3 filialı mövcuddur.
1.Əskipara filialı. Sahəsi 2783 ha- Əskipara kəndində yerləşir;
2.Damcılı filialı. Sahəsi 800 ha- DaşSalahlı kəndində yerləşir;
3.Göyəzən filialı. Sahəsi 30ha-Abbasbəyli kəndində yerləşir.
Qoruğun ərazisində 56 tarixi abidə qeydiyyata alınmışdır ki, bunlardan 1-i dünya, 33-ü ölkə, 22-si isə yerli əhəmiyyətlidir. Yenə də bunlardan 15-i memarlıq, 36-sı arxeoloji, 5 ədədi isə dekorativ tətbiqi sənət nümunəsinə aiddir.
Abidələrdən 13-ü sərhəd zolağında, 14-ü isə işğal altındadır.
Qeydiyyata alınması üçün qoruq ərazisində yerləşən 18 müxtəlif tarixi abidənin adı Nazirliyə təqdim olunmuşdur ki, bunlardan da ikisi işğal altındadır.
Abidələrdən qoruq ərazisində yerləşən, lakin qeydiyyata götürülməyən “Məmməd Koxa” bulağı Mədəniyyət və Turizm Nazirliyinin layihəsi və dəstəyi ilə tam bərpa olunmuşdur.
Ümumiyyətlə Qazax rayonunda qeydiyyata alınmış 112 arxeoloji və memarlıq abidələri var. Bunlardan 3-ü dünya əhəmiyyətli abidədir;
1. Sınıq körpü;
2.Damcılı mağarası;
3. Baba Dərviş abidəsi.
51-i ölkə əhəmiyyətli; 58-i isə yerli əhəmiyyətli abidədir. Bunların 45-i memarlıq; 56-sı arxeoloji; 6-sı bağ-park monumental; 5-i dekorativ-tətbiqi sənət nümunələridir.
Qoruq əcdadlarımızın bu ərazilərdəki yaşayış məskənlərini, ən qədim insanların, tayfaların həyat tərzini, mədəniyyətinin, inkişaf etmiş dövrlərini, ailə-məişət adətlərini və mənəvi mədəniyyət məsələlərini kompleks şəkildə tədqiq edir və araşdırır, bütövlükdə təbliğat yolu ilə ictimaiyyətə çatdırır. Eyni zamanda qoruq tarixi yerlərə ekskursiyalar təşkil edir. Mühazirə və söhbətlər, “18 aprel beynəlxalq abidələr və tarixi yerlər günü”, “27 sentyabr turizm günü” və digər müxtəlif kütləvi tədbirlər həyata keçirir.
Maddi mədəniyyət abidələri, etnoqrafik materiallar, əşyalar toplanılır, mütəmadi arxeoloji qazıntılar aparılır. Qazax mahalının keçmişi, tarixi, onun zəngin mədəni irsi öyrənilir.
Bu gün “Avey” Dövlət Tarix-Mədəniyyət Qoruğunun yaradılmasının 37-ci ildönümüdür.
Azərbaycanın qədim tarixini, Paleolit dövründən bu günə qədər uzanan mədəni irsimizi özündə yaşadan “Avey” Dövlət Tarix-Mədəniyyət Qoruğunun yaradılmasının 37-ci ildönümü münasibətilə bütün kollektivimizi ürəkdən təbrik edirik! Damcılı mağarasından Göyəzən zirvəsinədək uzanan bu müqəddəs torpaqların qorunması və gələcək nəsillərə ötürülməsi yolundakı fəaliyyətimizdə uğurlar arzulayırıq.
Daşların yaddaşını qoruyan, uca Göyəzənin ətəyində tarixin nəfəsini hiss etdirən “Avey” qoruğu 37 yaşında! Qədim məbədlərin sükutu, Avey dağının əzəməti və ulu babalarımızın izləri bu məkanda birləşir. Milli mənliyimizin aynası olan bu abidələr kompleksini qoruyan hər kəsə təşəkkür edirik. Yeni yaşınız mübarək əziz Avey kollektivi!
Şair Tofiq Saleh “Avey dağının dastanı” poemasında yazır:
Baxdıqca insanı aparır xəyal,
Yatır neçə idrak, neçə min kamal
Daşları lay-laydır, suxuru qumsal,
Allahdan vergidir bu böyük Mahal,
Yol ver, Avey dağı, aç qapıları,
Görüşünə hər yerdən insanlar gəlir!
Elnurə ALIYEVA,
Qazax rayonu Avey Dövlət Tarix Mədəniyyət Qoruğunun Elmi işçisi
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!