Bu gün, 15:28
Axı Tramp kimdir ki?!
ABŞ Prezidenti Donald Trampın İranı nüvə hüquqlarından məhrum etmək üçün heç bir əsası yoxdur.
Butov.az xəbər verir ki, bunu İran Prezidenti Məsud Pezeşkian deyib.
“Tramp deyir ki, İran nüvə hüquqlarından istifadə edə bilməz, amma hansı cinayətə görə istifadə edə bilmərik demir. O kimdir ki, bir milləti hüquqlarından məhrum etsin?!”, - o bildirib.
Bu gün, 07:38
Meloni Azərbaycana
gələcəkmi?
İtaliyanın Baş naziri Corca Meloninin yaxın həftələrdə Azərbaycana səfər edəcəyi bildirilir.
Bu barədə "Euronews" məlumat yayıb. Məlumata görə, səfərin may–iyun aylarında baş tutması planlaşdırılır.
İki ölkə arasında münasibətlərin əsas sütunlarından biri enerji sahəsidir. Azərbaycan qazı İtaliyaya Trans-Adriatik Boru Kəməri (TAP) vasitəsilə nəql olunur. Bu kəmər Xəzər regionunu Avropa ilə birləşdirən Cənub Qaz Dəhlizinin tərkib hissəsidir.
TAP-ın idarəedici direktoru Luka Şieppatinin “Euronews”a açıqlamasına görə, kommersiya fəaliyyətinə başladığı vaxtdan etibarən kəmər vasitəsilə İtaliyaya 47,5 milyard kubmetrdən çox təbii qaz çatdırılıb.
O bildirib ki, İtaliyanın SNAM şirkətinin məlumatına əsasən, 2025-ci ildə TAP vasitəsilə nəql olunan qaz ölkənin ümumi qaz tələbatının təxminən 16%-ni qarşılayıb.
Şieppati əlavə edib ki, ümumilikdə TAP vasitəsilə Avropaya 57 milyard kubmetrdən çox qaz ötürülüb. Bu isə tədarük marşrutlarının şaxələndirilməsinə və Avropanın enerji sisteminin dayanıqlığının artırılmasına töhfə verib.
17-04-2026, 17:16
Əliyev Şara ilə görüşdü
Aprelin 17-də Antalyada Azərbaycan Respublikasının Prezidenti İlham Əliyevin Suriya Ərəb Respublikasının keçid dövrü Prezidenti Əhməd əl-Şara ilə görüşüb. Söhbət zamanı Prezident İlham Əliyevlə Əhməd əş-Şaranın ötən il Azərbaycana səfəri zamanı, həmçinin 4-cü Antalya Diplomatiya Forumu çərçivəsində görüşləri məmnunluqla xatırlanıb.
Suriyada baş vermiş dəyişikliklərdən sonra ölkələrimiz arasında münasibətlərin inkişafı ilə bağlı konkret addımların atıldığı vurğulanıb.
Enerji sahəsində əməkdaşlığın vacibliyinə toxunularaq, bu xüsusda Azərbaycan qazının Türkiyə ərazisindən Suriyaya ixracı layihəsinin həyata keçirilməsinin əhəmiyyəti və bunun Suriyanın enerji təhlükəsizliyinə töhfə verməklə ümumilikdə bu ölkənin inkişafında önəmi qeyd olunub.
Əhməd əş-Şara Azərbaycanın Suriyaya göstərdiyi dəstəyə görə dövlət başçısına bir daha minnətdarlıq edib.
Görüşdə ikitərəfli münasibətlərin perspektivləri və qarşılıqlı maraq doğuran digər məsələlər ətrafında fikir mübadiləsi aparılıb, əlaqələrimizin inkişafında müxtəlif səviyyəli qarşılıqlı səfərlərin və təmasların roluna toxunulub.
Dövlətimizin başçısı Əhməd əş-Şaranı ölkəmizə səfərə dəvət edib.
Dəvət məmnunluqla qəbul olunub.
15-04-2026, 22:50
İndoneziya səfiri Xankəndi şəhərində - FOTO
Aprelin 15-də İndoneziyanın Azərbaycandakı fövqəladə və səlahiyyətli səfiri Berlian Helmin Qarabağa səfəri çərçivəsində Xankəndi şəhərinə gəlib. Xankəndi şəhərində, Ağdərə və Xocalı rayonlarında Prezidentin xüsusi nümayəndəliyinin məsləhətçisi Qasım İbrahimov, səfirə burada aparılan bərpa-quruculuq işləri, yenilənmiş infrastruktur, əhalinin köçü barədə məlumat verib. İlk dəfə Xankəndinə səfər edən səfir, şəhərə heyranlığını gizlətməyib. Xankəndi şəhərində, Ağdərə və Xocalı rayonlarında Bərpa,Tikinti və İdarəetmə Xidmətinin ictimaiyyətlə əlaqələr şöbəsindən verilən xəbərə görə, şəhərlə tanışlıqdan sonra B.Helmin Qarabağ Universitetini ziyarət edərək, kitabxana, dərs otaqlarına baxıb. Xatırladaq ki, B.Helmini Xankəndidən əvvəl Şuşa şəhərində olub. Səfir gələcəkdə İndoneziyanın şəhərlərindən birinin Şuşa ilə qardaşlaşmasının iki ölkə arasında münasibətlərə layiqli töhfə verə biləcəyini vurğulayıb.
13-04-2026, 22:07
İranda səfirlik
fəaliyyətini bərpa etdi
Bu gün Azərbaycan Respublikasının İran İslam Respublikasındakı Səfirliyi öz fəaliyyətini bərpa edib. Səfirlik ilkin mərhələdə səfir daxil olmaqla, məhdud sayda diplomatik və inzibati heyət ilə fəaliyyət göstərəcək. Təhlükəsizlik və təşkilati məsələlər nəzərə alınaraq, Səfirliyin fəaliyyətinin mərhələli şəkildə tənzimlənməsi planlaşdırılır.
Azərbaycan Səfirliyinin İranda hərbi əməliyyatların dayandırılması və iki həftəlik atəşkəsin elan olunmasından qısa müddət sonra fəaliyyətini bərpa etməsi Azərbaycanın qonşu və dost İran ilə münasibətlərə verdiyi xüsusi önəmin bariz nümunəsidir.
Ölkəmiz regionda davamlı sülh və sabitliyin təmin olunması istiqamətində irəli sürülən təşəbbüsləri dəstəklədiyini bir daha bəyan edir.
12-04-2026, 10:11
21 saatlıq
danışığın sonu
İslamabadda İranla danışıqlarda ABŞ heyətinə rəhbərlik edən ABŞ-ın vitse-prezidenti J Vens, Pakistanın İslamabad şəhərində düz 21 saatlıq danışıqlara baxmayaraq, iki tərəfin razılığa gələ bilmədiyini söylədi.
Vens danışıqlar başa çatdıqdan sonra verdiyi qısa açıqlamada bunları deyib:
"Pis xəbər odur ki, razılığa gələ bilməmişik və düşünürəm ki, bu, Amerika Birləşmiş Ştatları üçün yox, daha əslində, İran üçün pis xəbərdir."
Danışıqların hansı sahələrdə pisləşdiyi barədə suala cavab olaraq, Vens hələ ətraflı məlumat verməkdən imtina edib, lakin qeyd edib ki, ABŞ İrandan şərtlərə əməl etmə öhdəliyini gözləyir. .
8-04-2026, 16:51
Atəşkəs sonrası ilk zəng: Azərbaycanın İrana verdiyi siyasi mesaj
Azərbaycan Respublikasının Prezidenti İlham Əliyevin İran İslam Respublikasının Prezidenti Məsud Pezeşkiana telefon zəngi etməsi son günlər regionda baş verən hadisələrin fonunda xüsusi siyasi məna daşıyır.
İranla ABŞ arasında 2 həftəlik atəşkəsin elan olunması yalnız hərbi-siyasi gərginliyin azalması deyil, həm də region dövlətləri üçün yeni diplomatik imkanların yaranması kimi qiymətləndirilir. Bu kontekstdə Azərbaycanın dövlət başçısının İran Prezidentinə zəng edərək təbriklərini çatdırması Bakı ilə Tehran arasında münasibətlərin mahiyyətini bir daha ortaya qoyur.
Son aylarda regionda yaşanan gərginlik İran üçün olduqca çətin bir mərhələ kimi yadda qaldı. Xarici təzyiqlərin artdığı, təhlükəsizlik risklərinin çoxaldığı bir vaxtda Azərbaycan öz davranışı ilə qonşuluq və dostluq prinsipinə sadiq qaldığını nümayiş etdirdi. Bu dövrdə Azərbaycan-İran sərhədi İran üçün ən təhlükəsiz məkanlardan biri kimi qaldı. Müxtəlif dairələr tərəfindən səsləndirilən iddialara, Azərbaycandan İrana qarşı təhlükə yaradılması ilə bağlı yayılan əsassız fikirlərə baxmayaraq, real vəziyyət tam fərqli oldu. Azərbaycan ərazisindən İrana qarşı hər hansı təhlükənin yaranmaması faktı iki ölkə arasında mövcud olan qarşılıqlı etimadın mühüm göstəricisi kimi dəyərləndirilə bilər.
Bu mərhələdə diqqət çəkən mühüm məqamlardan biri də İranın Ali Dini Lideri Əli Xameneinin vəfatı ilə bağlı baş verən hadisələr oldu. Həmin həssas günlərdə İran xalqına ilk başsağlığı verən dövlət başçılarından biri məhz Azərbaycan Prezidenti oldu. Dövlət başçısının İran səfirliyinə gedərək başsağlığı verməsi diplomatik protokol çərçivəsindən kənara çıxan, daha çox siyasi və mənəvi məna daşıyan addım kimi qiymətləndirilir. Bu, iki xalq arasında tarixi, dini və mədəni bağların dərinliyini bir daha nümayiş etdirdi.
Azərbaycanın İran üçün çətin günlərdə göstərdiyi dəstək yalnız siyasi jestlərlə məhdudlaşmadı. Bakı humanitar sahədə də operativ və prinsipial addımlar atdı. Azərbaycanın hamıdan əvvəl iki dəfə İrana humanitar yardım göndərməsi, böhranlı şəraitdə qonşu dövlətə real dəstək göstərməsi beynəlxalq humanitar əməkdaşlıq baxımından mühüm hadisə oldu. Bu addımlar Azərbaycanın regionda məsuliyyətli tərəfdaş kimi çıxış etdiyini, humanitar məsələlərdə siyasi maraqlardan üstün davranmağa hazır olduğunu göstərdi.
Atəşkəs elan olunduqdan sonra İranı təbrik edən ilk liderin də məhz Azərbaycan Prezidenti olması təsadüfi deyil. Bu addım diplomatik münasibətlərin aktivliyinin göstəricisi olmaqla yanaşı, Bakı ilə Tehran arasında dialoqun davamlı xarakter daşıdığını təsdiqləyir. Azərbaycanın bu cür operativ reaksiyası regionda sülh və sabitliyin bərqərar olunmasına verdiyi önəmin göstəricisi kimi də şərh edilə bilər.
Bütün bu təşəbbüslər Azərbaycanın İrana dost münasibətinin konkret və real təzahürləri kimi qiymətləndirilə bilər. Azərbaycan yalnız bəyanat səviyyəsində deyil, praktiki addımlarla da qonşu dövlətə dəstəyini nümayiş etdirdi. Bu isə beynəlxalq münasibətlər sistemində etibarlı tərəfdaş imicinin formalaşmasında mühüm rol oynayır. Regionda mürəkkəb geosiyasi proseslərin getdiyi bir vaxtda belə münasibətlərin qorunması və inkişaf etdirilməsi strateji əhəmiyyət daşıyır.
Xüsusilə qeyd olunmalıdır ki, İranda zaman-zaman Azərbaycanı təhlükə kimi təqdim etməyə çalışan müəyyən dairələr mövcuddur. Bu dairələr informasiya məkanında Azərbaycandan düşmən obrazı yaratmağa cəhd göstərsələr də, son hadisələr onların arqumentlərinin reallıqdan uzaq olduğunu açıq şəkildə nümayiş etdirdi. Azərbaycanın davranışı göstərdi ki, Bakı regionda sabitliyin qorunmasında maraqlı olan məsuliyyətli aktordur və qonşu dövlətlərə qarşı düşmənçilik siyasəti yürütmür.
Mövcud reallıqlar fonunda ümid etmək olar ki, İranda Azərbaycanla bağlı yanlış təsəvvür formalaşdırmağa çalışan qüvvələrin təsir imkanları azalacaq. Azərbaycan tərəfinin ardıcıl və prinsipial siyasəti Tehran daxilində də obyektiv yanaşmaların güclənməsinə təkan verə bilər. Bu isə iki ölkə arasında qarşılıqlı etimadın daha da möhkəmlənməsinə xidmət edəcək.
Nəticə etibarilə, Prezident İlham Əliyevin İran Prezidenti Məsud Pezeşkiana telefon zəngi etməsi təkcə diplomatik nəzakət addımı deyil, həm də strateji mesaj kimi qiymətləndirilməlidir. Bu mesaj regionda sabitliyin qorunmasına, qonşuluq münasibətlərinin möhkəmləndirilməsinə və qarşılıqlı etimadın artırılmasına yönəlib. Azərbaycan son hadisələr fonunda göstərdi ki, çətin anlarda dostluq sözlə deyil, əməli addımlarla sübut olunur. Bu isə gələcəkdə Azərbaycan-İran münasibətlərinin daha sağlam və sabit əsaslar üzərində inkişaf edəcəyinə dair nikbin gözləntilər yaradır.
3-04-2026, 17:51
KTMT qatardır, qabağında Rusiyadır - Elmar Məmmədyarovdan Ermənistanla bağlı ŞOK AÇIQLAMA
Moldova parlamenti Müstəqil Dövlətlər Birliyinin (MDB) yaradılması sazişini və onun protokolunun ləğvini yekun oxunuşda qəbul edib. Moldova Xarici İşlər Nazirliyindən isə bildirilib ki, bu ölkənin MDB-dən rəsmi şəkildə çıxması üçün 1 il lazım olacaq.
Xatırlatmaq yerinə düşər ki, Moldovadan əvvəl Gürcüstan və Ukrayna da MDB-dən çıxıblar.
Analitiklərin fikrincə, Moldovanın MDB ilə bağlı qərarı bu təşkilatın sonrakı taleyi barədə suallar yaradır.
Məsələ ilə əlaqədar danışan sabiq xarici işlər naziri Elmar Məmmədyarov Azərbaycanın da eyni yolu getməsinə ehtiyac olmadığını bildirib:
"MDB Azərbaycan üçün pislik etməyib. Bu təşkilat elə bir məkandır ki, müxtəlif yerlərdə görüşlər olur, çıxışlar edilir. Bundan sonra öz evinə gedib işini görürsən. Bu baxımdan düşünmürəm ki, MDB-dən çıxmaq Azərbaycan üçün faydalı olar. İndi bilmirəm, sabah hansı hadisə olacaq...
Gürcüstan Cənubi Osetiya və Abxaziya məsələsinə görə, Ukrayna isə müharibəyə görə MDB-dən çıxdı. Moldova da müəyyən narahatlıqlara görə qorxur. Ancaq Azərbaycanın onların yolu ilə getməsinə ehtiyac olduğunu düşünmürəm.
MDB-nin taleyi necə olacaq məsələsinə gəldikdə, deyə bilərəm ki, hər şey elə belə də qalacaq. MDB-də böyük bir qatardır. Onun qabağında Rusiya gedir. Rusiya böyük ölkədir, yavaş-yavaş qurumun fəaliyyətini Orta Asiya ölkələri və Azərbaycanla birlikdə aparacaq. Ancaq yenə deyirəm, sabah böyük nəsə faciə olsa, bəlkə durum dəyişər. Misal üçün deyirdilər ki, Rusiya Ukrayna müharibəsi tezliklə qurtaracaq. Amma bu gün müharibənin dayana biləcəyinə ehtimal görmürəm. Heç atəşkəs əldə edə bilmirlər".
Sabiq nazir Ermənistanın KTMT-dən çıxması ilə bağlı suala isə belə cavab verib: "Məsələni dərindən analiz etsək, Ermənistanın KTMT-dən tam şəkildə çıxmaq istəmədiyi qənaətinə gələ bilərik. Çünki ortada təhlükəsizlik məsələsi var. Ermənistan KTMT-dən çıxsa, təhlükəsizliyini necə qoruyacaq? Paşinyan təhlükəsizlik üçün Azərbaycanla sülh imzalamlı olduqlarını deyir. Bu işləyən formuladır, yoxsa yox, məsələ dərindən təhlil olunmalıdır.
Ermənistan KTMT üzvlüyü üçün ödəniş etməsə də, onun tədbirlərinə qatılmasa da, kağız üzərində üzvdür. İndi Ermənistanda "bu təşkilatın yerinə Ermənistanı kim qoruyacaq" sualına cavab axtarırlar. Tam əminəm ki, heç Ermənistanın özündə necə edəcəklərini bilmirlər".
Elmar Məmmədyarov bu ilin iyununda Ermənistanda keçiriləcək parlament seçkiləri ilə bağlı da fikirlərini bölüşüb: “Maraqlı məqamlardan biri də Paşinyanla görüş zamanı Vladimir Putinin Samvel Karepetyanın seçkilərdə iştirakına eyham vurması idi. Bu, doğru yanaşma deyildi. Ermənistanın qanunları var. Yalnız Ermənistan vətəndaşı baş nazir seçilə bilər. Samvel Karepetyan Rusiya vətəndaşı olduğundan onun baş nazir olması mümkün deyil. Çox güman ki, Rusiya Ermənistandakı seçkilərə müdaxilə edəcək. Ermənistan Rusiya üçün yaxın və önəmli ölkədir. Paşinyan elə-belə demir ki, Ermənistan həmişə Rusiyanın yanında olacaq. Paşinyanın bu fikri tostdur, yoxsa doğrudan belə fikirləşir, bilmirəm. Amma Rusiya öz sözünü deyir.
Mənim fikrimcə, Paşinyan və onun partiyası 7 iyun seçkilərində qalib gələ bilər. Ermənistan əhalisinin əksəriyyəti Paşinyana səs verəcək. Neçə faizlə qalib gələcək, onu deyə bilmərəm. Yeri gəlmişkən, Paşinyanın koalisiyaya getməli olacağı ilə bağlı iddialar da var. Mən bu iddiaları doğru saymıram. Müxalif namizədlər Robert Köçəryan və Samvel Karepetyandır. Paşinyan onlarla necə koalisya qura bilər? Bu baxımdan onun təkbaşına iqtidar olacağını düşünürəm".
14-03-2026, 20:55
Bakıdan dünyaya təhlükəsizlik
və əməkdaşlıq mesajı
İlham Əliyev martın 12-də Bakıda keçirilən XIII Qlobal Bakı Forumunda “Keçid dövründə olan dünyada fikir ayrılıqlarının aradan qaldırılması” mövzusunda çıxış edərək müasir beynəlxalq münasibətlər sistemində təhlükəsizlik, sülh və əməkdaşlıq məsələlərinin əhəmiyyətinə toxunub. Dövlət başçısı bildirib ki, hazırkı geosiyasi şəraitdə təhlükəsizlik, sabitlik və müdafiə məsələləri hər bir ölkənin gündəliyində əsas prioritetə çevrilməlidir. Onun sözlərinə görə, bu amillər olmadan digər inkişaf istiqamətləri əhəmiyyətini itirir, çünki son illərdə uzun müddət sabit inkişaf yolu keçmiş dövlətlər belə ciddi risklərlə üzləşirlər.
Prezident qeyd edib ki, regional təhlükəsizlik Azərbaycan üçün hər zaman əsas məsələ olub. İşğal dövründə ölkənin əsas məqsədi sülhün təmin edilməsi və suverenliyin bərpası idi. Bu proses uzun illər davam etsə də, nəticədə Azərbaycan ərazi bütövlüyünü bərpa edib və hazırda regionda yeni mərhələ başlayıb. Dövlət başçısı vurğulayıb ki, Azərbaycan artıq yeddi aydır sülh şəraitində yaşayır və bu, güclü siyasi iradə, cəsarət və ardıcıl siyasətin nəticəsidir. Prezident xatırladıb ki, Azərbaycanın suverenliyi və ərazi bütövlüyü Birləşmiş Millətlər Təşkilatının Nizamnaməsində təsbit olunmuş özünümüdafiə hüququ çərçivəsində təmin edilib.
Dövlət başçısı bildirib ki, Azərbaycan işğal altında qalmış ərazilərini güc yolu ilə azad edib, lakin sülhə siyasi yollarla nail olub. Onun sözlərinə görə, bu, müasir tarixdə nadir nümunələrdən biridir. Təxminən 30 il ərzində ölkə ərazisinin 20 faizi işğal altında qalıb, milyonlarla insan etnik təmizləməyə məruz qalıb. Bu müddətdə beynəlxalq ictimaiyyət tərəfindən münaqişəyə lazımi səviyyədə diqqət yetirilməyib və bəzi beynəlxalq aktorların selektiv yanaşması problemin uzun illər həll olunmadan qalmasına səbəb olub. Prezident qeyd edib ki, BMT Təhlükəsizlik Şurasının Ermənistan silahlı qüvvələrinin Azərbaycan ərazilərindən çıxarılmasını tələb edən qətnamələri illərlə icra olunmayıb.
Prezident İlham Əliyev çıxışında 2020-ci ildə baş vermiş İkinci Qarabağ Müharibəsinin nəticələrinə də toxunaraq bildirib ki, sülh yolu ilə həll üçün bütün imkanlar tükəndikdə və beynəlxalq hüquq Azərbaycanın tərəfində olduqda gücdən istifadə qaçılmaz idi. Azərbaycan əvvəlcə hərbi yolla öz torpaqlarını azad edib, daha sonra siyasi dialoq vasitəsilə sülh prosesinə nail olub. Prezident bunu müasir tarixdə nadir təcrübə kimi qiymətləndirib və qeyd edib ki, bu proses suverenliyin bərpası ilə yanaşı regionda yeni siyasi reallıqlar yaradıb.
Dövlət başçısı vurğulayıb ki, Azərbaycan və Ermənistan arasında sülhün əldə olunması da mühüm tarixi mərhələdir. Onun sözlərinə görə, 2023-cü ilin sentyabrında baş vermiş son hərbi toqquşmadan sonra 2025-ci ilin avqustunda sülh sazişinin paraflanmasına qədər iki ildən də az vaxt keçib və bu, normallaşma prosesinin olduqca sürətli getdiyini göstərir. Prezident bildirib ki, hazırda sərhəddə sabitlik hökm sürür, atəşkəs pozuntuları və insan itkiləri müşahidə olunmur. Azərbaycanın məqsədi isə uzunmüddətli deyil, davamlı və möhkəm sülhün təmin edilməsidir.
Prezident İlham Əliyev qeyd edib ki, Azərbaycan sülhün yalnız kağız üzərində deyil, real həyatda möhkəmlənməsi üçün konkret addımlar atır. Bu çərçivədə Ermənistana müxtəlif istiqamətlərdən malların daşınmasına qoyulmuş bütün məhdudiyyətlər aradan qaldırılıb və ölkə üçün həyati əhəmiyyət kəsb edən neft məhsullarının ixracına başlanılıb. Dövlət başçısı vurğulayıb ki, bu addımlar Azərbaycanın sülhə sadiqliyinin göstəricisidir və ölkə regionda sabitliyin möhkəmlənməsinə töhfə vermək niyyətindədir.
Prezident çıxışında vasitəçilik institutunun fəaliyyətinə də toxunaraq bildirib ki, uzun illər münaqişənin həlli ilə məşğul olmuş ATƏT-in Minsk qrupunun fəaliyyəti nəticə verməyib. Onun sözlərinə görə, vasitəçilərin əsas məqsədi münaqişəni həll etməkdən daha çox onu dondurmaq və uzun müddət davam etdirmək olub.
Dövlət başçısı müasir dünyada enerji təhlükəsizliyinin də milli təhlükəsizliyin ayrılmaz hissəsinə çevrildiyini bildirib. Onun sözlərinə görə, enerji bazarında baş verən dəyişikliklər qlobal iqtisadiyyat üçün ciddi təsir yaradır və tarazlı enerji siyasəti böyük əhəmiyyət daşıyır. Prezident qeyd edib ki, Azərbaycan bütün enerji seqmentlərində – neft, qaz, neft məhsulları, neft-kimya məhsulları və elektrik enerjisi sahəsində istehsal və ixrac imkanlarına malikdir. Son bir ildə Azərbaycan qazını alan ölkələrin sayı 12-dən 16-ya yüksəlib və onların hamısı qazı boru kəmərləri vasitəsilə əldə edir. Bu göstəriciyə görə Azərbaycan coğrafi əhatə baxımından dünyada ən geniş qaz təchizat şəbəkəsinə malik ölkələrdən biridir.
Prezident İlham Əliyev çıxışında nəqliyyat və logistika sahəsində Azərbaycanın artan roluna da diqqət çəkib. O bildirib ki, münaqişələr və geosiyasi gərginliklər bir çox ənənəvi nəqliyyat marşrutlarının pozulmasına səbəb olur və bu, qlobal tədarük zəncirləri üçün ciddi problemlər yaradır. Azərbaycan isə enerji sektorundan əldə olunan gəlirləri nəqliyyat və logistika infrastrukturunun inkişafına yönəldərək regionun əsas tranzit mərkəzlərindən birinə çevrilib. Bu gün ölkə həm Şərq–Qərb nəqliyyat dəhlizi, həm də Şimal–Cənub nəqliyyat dəhlizi üzrə mühüm tərəfdaş kimi çıxış edir və hər iki marşrut üzrə infrastruktur layihələri artıq tam şəkildə tamamlanıb.
Prezident bildirib ki, Ermənistanla sülh əldə edildikdən sonra regionda yeni nəqliyyat imkanları yaranır. Bu çərçivədə Orta Dəhlizin yeni istiqaməti üzərində iş aparılır və bu marşrut Ermənistan ərazisindən keçəcək. Bu layihə Azərbaycanın əsas hissəsi ilə Naxçıvan Muxtar Respublikası arasında davamlı nəqliyyat, enerji və kommunikasiya əlaqələrinin yaradılmasına imkan verəcək. Prezident vurğulayıb ki, bu təşəbbüs yalnız Azərbaycan üçün deyil, region ölkələri üçün də yeni iqtisadi imkanlar yaradacaq və qarşılıqlı faydalı əməkdaşlıq mühitinin formalaşmasına xidmət edəcək.
Faiq Xosrovlu
Mehdiabad qəsəbə 5 nömrəli tam orta ümumtəhsil məktəbinin dirketoru
14-03-2026, 20:46
Azərbaycan və Avropa İttifaqı
münasibətlərində yeni mərhələ
İlham Əliyev 2026-cı il martın 11-də Avropa İttifaqı Şurasının Prezidenti Antonio Koştanın Azərbaycana səfəri zamanı keçirilən birgə mətbuat bəyanatında Bakı ilə Avropa İttifaqı arasında münasibətlərin hazırkı mərhələsi, enerji əməkdaşlığı, iqtisadi əlaqələr və regionda formalaşan yeni geosiyasi reallıqlar geniş şəkildə müzakirə olunub. Dövlət başçısı bildirib ki, Azərbaycan və Avropa İttifaqı müxtəlif səviyyələrdə tərəfdaşlığın fəal mərhələsindədir və son illərdə tərəflər arasında dialoq daha da intensivləşib.
Prezident qeyd edib ki, Avropa İttifaqı rəsmilərinin Azərbaycana mütəmadi səfərləri əlaqələrin dinamik inkişafının göstəricisidir. Onun sözlərinə görə, ticarət münasibətləri də bu əməkdaşlığın mühüm istiqamətlərindən biridir. Bu ilin yanvar ayının göstəricilərinə əsasən Azərbaycanın xarici ticarət dövriyyəsinin təxminən 50 faizi Avropa İttifaqının payına düşüb. Dövlət başçısı vurğulayıb ki, ötən il bu göstərici nisbətən aşağı olsa da, ümumilikdə Avropa İttifaqı Azərbaycan üçün əsas ticarət tərəfdaşı olaraq qalır. O bildirib ki, qarşılıqlı investisiyalar və yeni iqtisadi layihələr bu əməkdaşlığın daha da genişlənməsinə imkan yaradacaq, həm Avropa şirkətlərinin Azərbaycana sərmayələri, həm də Azərbaycanın Avropa iqtisadiyyatına yatırdığı investisiyalar artacaq.
Dövlət başçısı çıxışında enerji əməkdaşlığının Azərbaycan–Avropa İttifaqı münasibətlərinin strateji sütunlarından biri olduğunu xüsusi vurğulayıb. O xatırladıb ki, 2022-ci ildə Avropa Komissiyası ilə imzalanmış Enerji sahəsində Strateji Tərəfdaşlıq haqqında sənəd bu sahədə əməkdaşlığı yeni mərhələyə çıxarıb. Prezidentin sözlərinə görə, həmin vaxtdan etibarən Azərbaycanın Avropa ölkələrinə qaz ixracı həm həcm, həm də coğrafiya baxımından genişlənib.
Hazırda Avropa İttifaqının 10 üzvü Azərbaycan qazı alır və ümumilikdə bu qazı idxal edən ölkələrin sayı 16-ya çatıb. Bu göstərici Azərbaycanın boru kəmərləri vasitəsilə qaz təchizatı üzrə dünyada aparıcı ölkələrdən biri olduğunu göstərir və ölkənin bir çox dövlətlərin enerji təhlükəsizliyində rolunu daha da artırır.
Prezident İlham Əliyev bildirib ki, Avropa bazarı Azərbaycanın qaz ixracının əsas istiqamətlərindən biridir və böyük artım potensialına malikdir. O qeyd edib ki, bu ilin əvvəlində keçirilən Cənub Qaz Dəhlizi Məşvərət Şurasının illik toplantısında da bu məsələlər müzakirə olunub və Azərbaycan yaxın illərdə qaz hasilatını daha da artırmağı planlaşdırır. Yeni yataqlardan hasilata başlanılması nəticəsində növbəti iki-üç il ərzində mövcud həcmlə müqayisədə minimum 10 milyard kubmetr əlavə qazın bazara çıxarılması gözlənilir.
Dövlət başçısı enerji əməkdaşlığının yalnız ənənəvi karbohidrogen ehtiyatları ilə məhdudlaşmadığını, bərpaolunan enerji sahəsində də böyük perspektivlərin mövcud olduğunu diqqətə çatdırıb. Prezident bildirib ki, Azərbaycan külək, Günəş və su elektrik enerjisi sahələrinə geniş investisiyalar yatırır və qarşıdakı beş-altı il ərzində ixrac üçün 6–8 giqavat həcmində bərpaolunan enerji potensialının formalaşdırılması planlaşdırılır. Onun sözlərinə görə, bu istiqamətdə Avropa tərəfdaşları ilə yeni ötürmə xətləri, dənizaltı kabellər və enerji infrastrukturunun digər mühüm komponentləri üzərində iş aparılır. Prezident qeyd edib ki, ölkədə il ərzində 300-dən çox günəşli günün olması, eləcə də əlverişli külək potensialı Azərbaycanın yaşıl enerji sahəsində böyük imkanlara malik olduğunu göstərir.
Prezident İlham Əliyev çıxışında regionda formalaşan yeni siyasi reallıqlara da toxunaraq bildirib ki, Azərbaycan müstəqilliyini 1991-ci ildə bərpa etsə də, faktiki olaraq cəmi yeddi aydır sülh şəraitində yaşayır. Onun sözlərinə görə, Ermənistanla paraflanmış sülh sazişi regionda yeni əməkdaşlıq imkanları yaradır və artıq bunun ilk nəticələri hiss olunmağa başlayıb. Dövlət başçısı qeyd edib ki, nəqliyyat və logistika məsələləri ikitərəfli gündəliyin mühüm hissəsinə çevrilib və Orta Dəhlizin genişlənməsi üçün yeni imkanlar yaranır.
Prezident diqqətə çatdırıb ki, Azərbaycan sülhün praktik müstəvidə möhkəmlənməsi üçün konkret addımlar atır. Bu çərçivədə Ermənistana mühüm neft məhsullarının təchizatına başlanılıb, həmçinin digər ölkələrdən Azərbaycan ərazisi vasitəsilə Ermənistana yönələn yüklərin tranziti üçün mövcud məhdudiyyətlər aradan qaldırılıb. Dövlət başçısı vurğulayıb ki, bu addımlar Azərbaycanın sülhə yalnız imzalanan sənədlər çərçivəsində deyil, real addımlarla sadiq olduğunu nümayiş etdirir.
Prezident İlham Əliyev xatırladıb ki, 2023-cü ilin sentyabrında baş vermiş son hərbi toqquşmadan sonra 2025-ci ilin avqustunda sülh razılaşmasının əldə olunmasına qədər iki ildən də az vaxt keçib. Onun sözlərinə görə, əgər tərəflər siyasi iradə nümayiş etdirərək sülhə sadiq qalarlarsa, bu, dövlətlər və xalqlar arasında barışığın ən yaxşı göstəricisi olacaq. Dövlət başçısı vurğulayıb ki, müharibənin nə olduğunu yaxşı bilən ölkə kimi Azərbaycan üçün sülh ən böyük dəyərdir və regionda sabitliyin möhkəmləndirilməsi bundan sonra da əsas prioritet olaraq qalacaq.
Elmar Abbasov
Abşeron RİH başçısının Məmmədli kənd inzibati ərazi dairəsi üzrə nümayəndəsi
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!