Beynəlxaq  Mətbuat  Mərkəzində “Yada düşdü” jurnalının iki yaşı qeyd olunub və eyniadlı filmin təqdimatı keçirildi. Tədbir iştirakçılarını qarşıdan gələn “Novruz”  bayramı  və jurnalın iki yaşının tamam olması münasibətilə təbrik edən Mətbuat Şurasının sədri Əflatun Amaşov  sözü şair Zəlimxan Yaquba verdi. Z.Yaqub iki il ərzində 13 sayı işıq üzü görən jurnalın hazırda respublikamızda çap olunan jurnallardan fərqli cəhətlərini, özünəməxsus bədii və estetik məziyyətlərini təhlil etdi.

             “Azərbaycan” jurnalının baş redaktoru İntiqam Qasımzadə, qiraət ustası Ağalar Bayramov, jurnalist Flora Xəlilzadə, Türkiyə Cümhuriyyəti səfirliyinin nümayəndəsi, QHT rəhbəri Rauf Zeyniyev, “Kredo” qəzetinin baş redaktoru Əli Rza Xələfli və digər çıxış edənlər “Yada düşdü” jurnalının təsisçisi Nəzakət xanım Məmmədovanı, baş redaktor Nahid Hacızadəni, jurnalın yaradıcı və texniki heyətini, oxucularını təbrik etdilər, yaradıcılıq uğurları arzuladılar. Baş redaktor jurnalın məramından, onun ərsəyə gəlməsinin müxtəlif məqamlarından söhbət açdı. Qeyd etdi ki, jurnalın əsas istiqaməti nostalgiyadır. Ötənləri, keçənləri yada salmaqdır.”Yada düşdü”nün “Ölməzlər”, “Unutsaq unudularıq”, “Olanlardan, keçənlərdən”, “Qəlbimizə yazılan şeirlər”, “Yazıçı ömrünün rəngləri”, “Yaddaşımızda yaşayanlar” kimi rubrikaları oxucular tərəfindən sevilə-sevilə oxunur.

         Jurnala həsr olunmuş film nümayiş etdirildikdən sonra  təsisçi Nəzakət Məmmədova dəvətlərini qəbul edib tədbirə qatılanlara minnətdarlığını bildirdi. Onu da qeyd etdi ki, jurnal artıq Azərbaycanın hüdudlarını aşıb. Türkiyədə, İranda, Almaniyada və MDB ölkələrində “Yada düşdü” jurnalının abunəçiləri və oxucuları var.

Butov.az